F’din il-paġna tista’ ssib lista kkumpilata ta’ mistoqsijiet frekwenti relatati mal-edukazzjoni fil-BCA, inklużi l-Iskill Cards.
Għal aktar informazzjoni, jekk jogħġbok ikkuntattjana fuq: [email protected].
Kif nista’ napplika għall-iskill card?
Biex wieħed japplika għas-CISC jista’ jniżżel l-applikazzjoni minn fuq il-websajt uffiċjali tal-BCA www.bca.org.mt/education/skill-card. Ladarba l-ħlas jintbagħat mill-applikant u tasal id-dokumentazzjoni kollha mitluba, il-BCA tibda tipproċessa l-applikazzjoni biex toħroġ l-iskill card.
Fejn nibgħat il-formola tal-applikazzjoni?
Għalissa, l-applikant irid jibgħat il-formola tal-applikazzjoni u d-dokumentazzjoni mitluba fuq [email protected].
Jista’ jkolli aktar minn sengħa waħda stampata fuq l-Iskill Card tiegħi?
Iva, tista’ tapplika għal skill card u jkollok aktar minn sengħa waħda rreġistrata fuq l-istess kard.
Għandi kwalifika relatata mal-kostruzzjoni. Għandi għalfejn napplika wkoll għal Skill Card?
Iva. Ladarba l-leġislazzjoni sussidjarja tiġi approvata, kull min jidħol f’sit ta’ kostruzzjoni jrid ikollu skill card. Jekk il-persuna tkun biss qed iżżur, hija tista’ tuża l-kard tal-viżitatur miksuba temporanjament mis-superviżur/maniġer tas-sit.
Xi kwalifiki għandi bżonn biex l-okkupazzjoni tiegħi tkun tista’ tapplika għal Skill Card?
Biex wieħed ikun eliġibbli għal skill card, irid ikollu ċertifikat tas-saħħa u s-sikurezza u tat-Trade Competency minn korp/istituzzjoni rikonoxxuta.
X’għandi nagħmel jekk nikseb il-kwalifika/I tiegħi barra minn Malta?
Kwalunkwe kwalifika miksuba minn kwalunkwe pajjiż ieħor fi ħdan/barra l-UE tiġi eżaminata mill-Malta Qualifications Recognition Information Centre (MQRIC), li huwa l-korp kompetenti fi ħdan l-MFHEA li jirrikonoxxi kwalifiki kontra l-Malta Qualifications Framework (MQF). Aktar informazzjoni tinsab fuq: https://mfhea.mt/academic-qualifications/
Ilni nagħmel xogħli u ma rridx nerġa’ mmur l-iskola biex inġib Skill Card. Hemm xi modijiet għalija?
L-individwi kollha jeħtieġ li jattendu u jiksbu ċertifikat tas-saħħa u s-sikurezza. Huwa meħtieġ ukoll test tal-kummerċ maħruġ minn Jobs+, jekk wieħed ma jkunx irid imur lura l-iskola. Aktar informazzjoni dwar is-Sistema tal-ittestjar tal-Kummerċ: https://jobsplus.gov.mt/training-opportunities/trade-testing-system.
Il-korsijiet tas-saħħa u s-sikurezza huma b’xejn?
Il-kors Basic H&S Awareness huwa bi ħlas nominali ta’ €30. Il-kors Supervisory and Professional H&S huwa bi ħlas ta’ €120. Fiż-żewġ każijiet, jinħareġ ċertifikat. Wieħed jista’ japplika għall-kors tal-H&S billi jibgħat imejl fuq [email protected].
Kemm tiswa l-iskill card?
L-Iskill Card tal-Industrija tal-Kostruzzjoni tiswa €15. Il-ħlas jista’ jiġi affettwat permezz ta’ trasferiment bankarju fuq: MT42VALL22013000000050018099503
X’jiġri jekk nitlef l-iskill card?
Wieħed jista’ jerġa’ japplika għall-iskill card mitlufa billi jibgħat imejl fuq [email protected]. Se jkun hemm ħlas ta’ €15 biex tinbidel l-iskill card li ntilfet.
Wara li tkun inkisbet l-iskill card, din trid tiġġedded kull sena?
L-iskill cards jeħtieġ li jiġġeddu kull ħames snin, jew kull darba li wieħed jikseb livell ogħla ta’ ħiliet.